Erdogan ku di her axaftina xwe de pesnên xwe didan ku wî Artêşa Tirk
a parêzvaniya çeteyên şer dike aniye ser riya rast, li ber Başbug di
kozika şer de çokda rûniştin.
Fermandarekî Hêzên
Pêşmergeyan diyar kir ku dê Tirkiye operasyonekê li dijî başûrê
Kurdistanê li dar bixe. Heman fermandarî diyar kir ku yekîneyên leşkerî
yên Artêşa Tirk ên ku ji berê de li nava xaka başûrê Kurdistanê, ango li
Amêdî, Bamernê, Kanîmasî û Şêladiza ne, ji bo operasyonekê ketine nava
liv û tevgerê.
Her ku diçe Artêşa Tirk leşkeran vediguhêze ser sînorê
başûrê Kurdistanê, ev veguhestin û tevgera leşkerî gel û rayedarên
başûrê Kurdistanê jî bêzar dikin. Fermandarekî Pêşmergeyan diyar kir ku
leşkerên Tirk yên ji berê de li nava xaka Kurdistanê ne, ji bo
amadekariyên operasyonekê de ne.
SERDAGIRTIN PÊKAN E
Fermandarekî pêşmergeyan ku
nexwest navê xwe bêje, ji malpera Aswataliraqê re axiviye. Fermandar
diyar kir ku dê Artêşa Tirk li dijî başûrê Kurdistanê operasyonekê pêk
bîne. Li gorî nûçeyê, tê îdiakirin, dê operasyon di nava çend rojan de
dest pê bike. Her wiha, hat ragihandin ku Artêşa Tirk carinan dikeve
xaka başûrê Kurdistanê û bi balafirên şer jî êrîşî Herêma Kurdistanê
dikin.
YEKÎNEYÊN TIRKAN
Heman çavkaniyê diyar kir, ku
hêzên leşkerî yên Artêşa Tirk yên ku ji berê de li Herêma Kurdistanê ne,
ango li Amêdî, Bamernê, Şêladiza û Kanîmasiyê, ji bo operasyonê di nava
liv û tevgerê de ne.
HELWESTA HIKÛMETÊ
Berdevkê Hikumeta Kurd Kawa
Mehmûd jî ji rojnameya Aso re axivî û diyar kir, ew ji ber topebarana
Artêşa Tirk bêzar dibin. Mehmûd ragihand, ger operasyon berdewam bikin
ew ê bikevin nava hewldanên dîplomatîk û helwesteke cuda nîşan bidin.
YAWERÎ
ÇI GOT?
Berdevkê Wezareta Pêşmerge, Cebar Yawer jî ji
Aknewsê re axivî û diyar kir, di vê operasyon ji bo rojekê pêk bê. Yawer
got; "mafê pêşmergeyan heye ku sînorên Herêma Kurdistanê biparêzin.” Li
aliyê din, çavkaniyên ku êrîşa Artêşa Tirk a ji bo Zapê jî ji nêz ve
şopandî tînin ziman ku dersînorbûna Artêşa Tirk dê bibe sedemê pevçûnên
giran û dema Artêşa Tirk zêdegaveke bi vî rengî bike dê bedeleke giran
jî bide.
‘Welatê Serokwezîrê wî çokdayî’
Nivîskar Nazim Alpman di quncikê xwe yên InternetHaberê de ev wêneyê
Erdogan şîrove kir û sernavê ‘Welatê Serokwezîrê wî çokdayî’ avêt.
Alpman
di nivîsa xwe de wiha got: "Ev wêneyê Serokwezîr Recep Tayyîp Erdogan ê
li çiyayên Colemêrgê hatiye kişandin, di heman demê de wêneyê siyaseta
Tirkiyeyê ye… Ligel Serfermandar Îlker Başbug li Gareyê di kozikê de çok
daye, bi awirên xembar li dûr dinêre. Vî pozê Erdogan ev pirs anî hizra
her kesekî ku li vî welatî dijîn: Em ber bi ku ve diçin?
(…)
Bi
tunehesibanda PKK’ê, daxistina pirsgirêk a asta pirsgirêka ewlehiyê
dîwarekî mezin nijinand. Nazli Ilicak vê sibehê (duh) di televîzyona
HaberTurkê de wiha got: 
- Dibe ku bi PKK’ê re hevdîtin çêbibe, heta
divê çêbibe!
Divê cerebeyên 41 salan ên Kevnemuşteşarê Rêxistina
Îstîxbaratê ya Neteweyî (MÎT) Cevat Oneş li ber çavan bên girtin û
gotinên wî baş bêne nirxandin. Ji Neşe Duzela Tarafê re dibêje:
-PKK
lingê duyemîn ê pirsgirêka kurd e. Çareserî ancax bi çekdanîna PKK’ê
mumkûn e. Ji bo vê Abdullah Ocalan û Qendîl jî di nav de, divê bi her
kesî re bê axaftin!
Tu kes nikare ji Cevat Oneş re bêje ‘Neyarê
Tirkiyeyê ye’.
Mumkûn e ku bê gotin; di nava hewldaneke aqlê-selîm
de ye…
Herî zêde jî pêdiviya Erdogan bi vê yekê heye. Lewre wêneyê ku
di kozikê de dayî dilveker nîn e.
-Welatê Serokwezîrê wî çokdayî!”
Vî
wêneyê Erdogan wêneyê Kevneserokwezîr Tansu Çîllerê yê bi bereyê Tîmên
Taybet kişandî anî bîra me. Wisa dixuyê ku pirsgirêka kurd dê Erdogan jî
bişîne cem Tansu Çîllerê
|
